Հայոց պատմության ամենաողբերգական էջերից է Մեծ եղեռնի իրողությունը, որին յուրօրինակ անդրադարձ էր Երևանի քաղաքապետարանի ՀայԱրտ մշակութային կենտրոնի և Հայաստանի պետական ֆիլհարմոնիայի կազմակերպած երեկոն՝ Առնո Բաբաջանյան համերգասրահում: Հանդիսատեսին ներկայացվեց Ռիտա Շառոյանի «Կոմիտասի սրինգը» հեղինակային ֆիլմը՝ նվիրված Կոմիտասի 150-ամյակին: Գեղարվեստափաստագրական նյութերով հարուստ ֆիլմը ինքնատիպ վկայություն է Կոմիտասի մեծությանը և իր գողտրիկ սրինգի արժևորմանը, նաև պատասխան է իր գերմանացի ուսուցչի՝ երաժշտագետ, տեսաբան, կոմպոզիտոր Ռիխարդ Շմիդտի հարցին՝ «Ո՞վ է սրինգը, հեր Կոմիտաս»:
«Նա ցույց տվեց հայ աշխատավոր ժողովրդի հանճարը, նրա հոգեկան հարստության անսպառ գանձերը, նրա երաժշտական «ճարտարապետությունը», երաժշտական «մանրանկարչությունը», երաժշտական «տաղերգությունը», երաժշտական «էպոսը», նա է, որ ուղի հարթեց նոր երաժշտության, դրա հաղթական վերընթացին:
Նա հպարտություն տվեց հայ ժողովրդական մեծ արվեստին: Նա է հիմնադիրը և ուղեցույցը ազգային երաժշտության մշակույթի». Դերենիկ Դեմիրճյան